Mbi 10 mijë firma për rikthimin e linjës hekurudhore mes Zvicrës dhe Francës

Qytetarët kërkojnë rikthimin e lidhjes direkte Lausanne–Paris përmes Vallorbe, e cila u ndërpre në vitin 2019

Mbi 10 mijë persona kanë nënshkruar një peticion që kërkon rikthimin e linjës së katërt të trenit me shpejtësi të lartë TGV Lyria ndërmjet Lausanne dhe Parisit, përmes Vallorbe, e cila u hoq nga orari në vitin 2019, transmeton albinfo.ch.

Nismëtarët e peticionit thonë se mbështetja e madhe tregon dëshirën në rritje të qytetarëve për lidhje më të forta hekurudhore mes Zvicrës dhe Francës.

“Ky mobilizim dëshmon se po forcohet një lëvizje e vërtetë ndërkufitare, e udhëhequr nga dëshira e përbashkët për të përmirësuar lidhjet hekurudhore mes dy vendeve tona”, thuhet në deklaratën e organizatorëve.

Linja e katërt e TGV Lyria, që lidhte Lausanne me Parisin përmes Vallorbe, u ndërpre në vitin 2019. Që atëherë, operatori ka orientuar më shumë shërbime drejt itinerarit përmes Gjenevës, duke reduktuar ndjeshëm numrin e trenave që kalojnë nga Vallorbe.

Mbështetësit e peticionit argumentojnë se rikthimi i kësaj linje do të përmirësonte lëvizjen e udhëtarëve, do të forconte bashkëpunimin ndërkufitar dhe do të ofronte një alternativë më të mirë e më të qëndrueshme ndaj transportit rrugor dhe ajror.

---