Mbi 3600 nënshkrime të falsifikuara për një iniciativë popullore, në Zvicër

Bie në sy fakti se shumica e nënshkrimeve të rreme vijnë nga kantoni i Gjenevës, gjithsej 3308 sosh. Shumë syresh janë nënshrkuar nga e njëjta dorë

Gjatë mbledhjes së nënshkrimeve për të ashtuquajturën “nismë furnizimi”, iniciativë kjo në nivel nacional të Zvicrës, janë zbuluar parregullsi.

Gjatë një kontrolli, u gjetën më shumë se 3600 nënshkrime të pavlefshme, siç ka konfirmuar për gazetat Tamedia Kancelaria Federale, e cila është institucioni përgjegjës për pranimin e nënshkrimeve të iniciativave në nivelin federal, transmeton albinfo.ch.

Sipas raportit, bie në sy fakti se shumica e nënshkrimeve të rreme vijnë nga kantoni i Gjenevës, gjithsej 3308 sosh. Një analizë forensike ka treguar se shumë nënshkrime ishin shkruar nga e njëjta dorë.

Dy kompani gjithashtu kishin mbledhur nënshkrime për nismën. Sipas shkrimit të gazetës, një pjesë e madhe e informacionit të shpallur të pavlefshëm ka ardhur nga një prej këtyre kompanive.

Komiteti nismëtar është shprehur se dëshiron të bashkëpunojë me autoritetet. Sidoqoftë, nisma ka plotësuar numrin e nënshkrimeve edhe pa nënshkrime të pavlefshme. Nisma popullore “Po për sigurinë e kujdesit mjekësor” u lançua zyrtarisht pak para Krishtlindjeve, me 108,709 nënshkrime të vlefshme.

---