Mbillen 116 fidanë, në shenjë mirënjohjeje për vendet që e kanë njohur Kosovën

116 fidanë janë mbjellë në shenjë mirënjohjeje për të gjitha vendet që e kanë njohur pavarësinë së Kosovës. Ky aktivitet është mbajtur në kuadër të aktiviteteve për dhjetëvjetorin e pavarësisë, në memorialin “Adem Jashari” në Prekaz, përcjell albinfo.ch.

Ministrja e Mjedisit dhe e Planifikimit Hapësinor, Albena Resitaj, ka thënë se kanë bërë gati vendet që të mbillen fidanë edhe për vendet e tjera që pritet ta njohin Kosovën, sidomos pesëshja e BE-së.

Në këtë aktivitet kanë marrë pjesë edhe disa ambasadorë dhe ministri i Mjedisit i Maqedonisë, Sadulla Duraki. “Kosova është pjesë e Evropës, prandaj nga memoriali në Prekaz u bëjmë thirrje shteteve që nuk e kanë njohur ta bëjnë atë, ngase Kosova e ka dëshmuar dhe po e dëshmon se është për stabilitet dhe për paqen në rajon dhe këtë nuk mund ta mohojë askush”, ka thënë ajo.

Ky vend që ne sot kemi vendosur të mbjellim fidanë jep mesazhin më të mirë për sakrificën dhe vuajtjen e popullit për liri. Ministri i Mjedisit të Maqedonisë ka thënë se shpreson që këto fidanë të rriten dhe të rrezatojnë për të mirën e njerëzimit.