Mbyllet Panairi i Veturave në Gjenevë: Më pak vizitorë se që është pritur

Gjatë 11 ditëve panairi është vizituar nga 660.000 veta. Kjo është për 30 mijë më pak se një vit më parë, dhe për 40 mijë më pak se sa ishte pritur

Keystone

11 ditë nga hapja e tij, ka mbyllur sot dyert Panairi i automobilave i Gjenevës, më i madhi në Zvicër dhe njëri ndër më të mëdhenjtë në Evropë e më gjerë.

Ndryshe nga pritjet, panairi në edicionin e sivjetmë ka qenë më pak i vizituar se në edicionin e një viti më parë, shkruan srf.ch. Kështu, gjatë 11 ditëve sa ka qenë në dispozicion, panairi është vizituar nga 660.000 veta, transmeton albinfo.ch. Kjo është për 30 mijë më pak se një vit më parë, dhe për 40 mijë më pak se sa ishte pritur, pasi që prognozat bënin fjalë për 700 mijë vizitorë të mundshëm.

Por edhe përkundër këtij bilanci jo të mirë sa i përket shifrave të mysafirëve, organizatorët shprehen të kënaqur me panairin në përgjithësi. Sipas tyre ka pasur më pak trafik nëpër rrugë dhe më pak tollovi në parkingje por prandaj më shumë hapësirë për debat në stendat e panairit.

Në panairin e 88-të me radhë të Gjenevës, rreth 180 ekspozuar nga e gjithë bota kanë prezantuar para publikut 110 premiera evropiane dhe botërore nga industria automobilistike.