Mbyllet pas 156 vitesh ëmbëltorja historike në Zvicër

Confiserie Schiesser në Bazel, e njohur si kafeneja më e vjetër në Zvicër, ka shpallur falimentimin. Pak muaj më parë ndërroi jetë edhe pronari i saj afatgjatë.

Një prej emrave më të njohur të traditës së ëmbëltarive në Zvicër ka mbyllur përfundimisht dyert pas 156 vitesh aktiviteti, përcjell albinfo.ch. 

Confiserie Schiesser, e vendosur në sheshin qendror të Bazelit dhe e konsideruar si kafeneja më e vjetër në Zvicër, ka shpallur falimentimin. Procedura zyrtare e falimentimit u hap më 30 qershor, duke i dhënë fund historisë së këtij biznesi të themeluar në vitin 1870.

Mbyllja vjen vetëm pak muaj pasi pronari shumëvjeçar, Stephan Schiesser, ndërroi jetë papritur në muajin prill, në moshën 69-vjeçare.

Rasti i Confiserie Schiesser është pjesë e një vale mbylljesh të bizneseve tradicionale në sektorin e furrave dhe ëmbëltoreve në Zvicër. Që nga viti 2023, disa ndërmarrje me histori të gjatë kanë ndërprerë aktivitetin për shkak të vështirësive ekonomike dhe ndryshimeve në treg./Albinfo.ch 

---