Mbyllet procesi i privatizimit të PTK-së

Ky vendim është marrë pasi “Hrvatski Telekom” është tërhequr nga gara për të blerë PTK-në, duke mbetur ofertuesi “Austria Telekom”

Komiteti Qeveritar për Privatizimin e PTK-së, ka marr vendim për të shpallur të mbyllur procesin e privatizimit të Postë Telekomit të Kosovës dhe ka filluar përgatitjet për një proces të ri.

Ky vendim është marrë pasi “Hrvatski Telekom” është tërhequr nga gara për të blerë PTK-në, duke mbetur vetëm një ofertues në këtë proces, “Austria Telekom”.

Me këtë rast ministri i Zhvillimit Ekonomik, Besim Beqaj nuk e ka quajtur dështim këtë proces, por mbyllje të një procesi dhe përgatitje të një procesi të ri.

“Pra, ne do të vazhdojmë me procesin e privatizimit, do të vazhdojmë me përpjekjet tonë për të vënë themelet e ekonomisë së tregut, do të vazhdojmë përpjekjet tona me orientim për të rrit atraktivitetin e ndërmarrjeve, të cilat do të jenë në proces të privatizimit konform planit strategjik, të cilin e kemi prezantuar si qeveri për zhvillimin ekonomik”, ka thënë Beqaj.

Pas kualifikimit të dy kompanive si ofertuesit më serioz për blerjen e PTK-së, “Austria Telekom” dhe “Hrvatski Telekom”, kjo e fundit është tërhequr, duke bërë që në garë të mbetet vetëm një kompani. Ndërsa nuk dihet data e fillimit të procesit të ri për privatizim.