Më 6 maj, temperatura në Bernë u ul në minus 7.6 gradë

Siç njofton SRF Meteo edhe në natën e sontme, në mes të të hënës dhe të martes pritet të ketë ngrica.

Natën në mes të së dielës dhe të hënës ngricat kanë qenë të pranishme praktikisht në gjithë Zvicrën. Por në disa pika janë regjistruar temperatura më të ulëta. Kështu, në Bernë zhiva në termometër ishte ulur në minus 7.6 gradë celsius.

Siç bën të ditur SRF Meteo, në pothuajse gjithë Zvicrën është njoftuar për ngrica. Të goditura nga kjo kanë qenë shumë lokalitete nga Liqeni i Gjenevës deri në Liqenin Bodensee, që domethënë në gjithë vijën horizontale të Zvicrës. Temperatura pak më të buta janë shënuar vetëm në lindjen e skajshme të vendit, transmeton albinfo.ch. Atje retë kanë siguruar temperatura relativisht të larta në krahasim me pjesën tjetër të vendit.

Siç njofton më tutje SRF Meteo edhe në natën e sontme, në mes të të hënës dhe të martes pritet të ketë ngrica.

Sipas shërbimit të përmendur meteorologjik, moti me ngrica nuk mund të përjashtohet madje deri në fillim të qershorit. Temperaturat e tilla të ulëta gjatë muajit maj u shkaktojnë probleme para së gjithash drurëve frutorë.

---