Më shumë roje kufitare për t`u përballur me terrorizmin

Kërkesa për shtim të personelit të rojeve të kufirit në Zvicër ka pasur edhe para rritjes së valës së refugjatëve dhe para sulmeve terroriste që ndodhën të premten e kaluar në Paris. Ato i ka bërë me kohë ministrja Eveline Widmer-Schlumpf. Sipas saj nevojitet një ndryshim i qasjes në parlament rreth kësaj çështjeje për të mundësuar bazën ligjore të shtimit të personelit.

Gjithsej 116 vendet e reja të punës në këtë shërbim që i ka lejuar parlamenti gjatë tri viteve të kaluara nuk mjaftojnë, ka thënë Widmer-Schlumpf të martën para medieve në Bernë.

Ndërsa shefi i shërbimit të rojeve kufitare në nivel vendi, Jürg Nöth ka deklaruar të hënën se ky shërbim ka nevojë për më shumë mbështetje nga kantonet dhe nga policia ushtarake, sidomos në rast të ashpësimit të krizës së refugjatëve.

Si Schlumpf ashtu dhe Nöth kanë folur për shifrat prej 200 deri 300 të punësuarish të rinj, si të mjaftueshme për të parandaluar hyrjen e terroristëve në vend, shkruan srf.ch. Por mbetet problem aftësimi, gjegjësisht shkollimi i rojeve kufitare, i cili zgjat së paku tre vjet.