Më shumë se 80 mijë turistë bllokohen në Kinë

Autoritetet morën vendim për izolimin e qytetit Sanja për shkak të shpërthimit të Covid-19

Shpërthimi i koronavirusit ka bërë që më shumë se 80 mijë turistë të mbesin të bllokuar në qytetin Sanja në Kinë. Autoritetet morën vendim për izolimin e qytetit për shkak të shpërthimit të Covid-19.

Po ashtu, autoritetet kineze kanë anuluar të gjitha fluturimet dhe udhëtimet me tren nga Sanja, pasi të shtunën janë konfirmuar 263 raste pozitive.

Siç shkruan REL, të gjithë udhëtarët duhet të kenë pesë teste negative në koronavirus, të kryera në shtatë ditët e fundit, në mënyrë që t’iu mundësohet dalja nga qyteti, transmeton Albinfo.ch.

Kina është ndër shtetet e pakta në botë që ende zbaton politikën e “zero rasteve me COVID”.

Sipas të dhënave të Universitetit Johns Hopkins, ky shtet ka regjistruar më pak se 15 mijë vdekje me koronavirus prej shpërthimit të pandemisë.

Megjithatë ka shqetësime për ndikimin e kufizimeve kaq të ashpra në ekonomi.

Kufizimet në Sanja, qytet në jug të ishullit Hainan, janë bërë të ditura në pikun e sezonit turistik./Albinfo.ch/

---