Me vende bosh në avion, ulet rreziku i infektimit me COVID-19

EPA/ROMAN PILIPEY

Lënia e vendeve të mesme bosh në avion mund të garantojë një zvogëlim të rreziqeve të ekspozimit dhe, si rrjedhojë, infektimit potencial me COVID-19 midis 23 dhe 57%, në varësi të llojit të avionit, sipas një studimi të ri të kryer nga Universiteti i Kansas dhe i botuar nga Qendrat amerikane për Kontrollin dhe Parandalimin e Sëmundjeve (CDC).

Studiuesit përdorën simulatorë për të imituar shpejtësinë e lëvizjes së grimcave aerosole të Sars-Cov 2 dhe ngarkesën e mundshme virale të pranishme në vende të ndryshme, në varësi të distancës së udhëtarëve nga individët e infektuar, shkruan Ansa, përcjell Albinfo.ch.

Sipas studimit, nëse vendet qendrore mbahen bosh nëpër avionë, qoftë me një korridor të vetëm qendror, qoftë me dy korridore, mundësia e ekspozimit ndaj grimcave të virusit në ajër është 23-57% më e ulët, se ajo që do të ndodhte në avionët me vende plotësisht të zëna.