Mediat ndërkombëtare për zgjedhjen e Shiroka-Pulës: Kosova shmangu zgjedhjet e reja

Reuters, Associated Press dhe Radio Evropa e Lirë kanë raportuar gjerësisht për zgjedhjen e Justina Shiroka-Pulës Presidente të Kosovës, duke e cilësuar votimin si një marrëveshje të minutës së fundit që shmangu shpërndarjen e Kuvendit dhe zgjedhjet e reja parlamentare.

Kuvendi i Kosovës zgjodhi ekonomisten dhe akademiken Justina Shiroka-Pula Presidente të Republikës në orët e para të së mërkurës, vetëm pak para skadimit të afatit kushtetues, përcjell albinfo.ch.

Shiroka-Pula mori 81 vota nga 120 deputetë, vetëm një votë më shumë se minimumi prej 80 votash i nevojshëm për zgjedhjen e presidentes. Sipas Radio Evropës së Lirë, votimi i fshehtë nisi gjashtë minuta para mesnatës, ndërsa procesi përfundoi 12 minuta pas mesnatës.

Sipas Reuters dhe Associated Press, zgjedhja e saj shmangu shpërndarjen e Kuvendit dhe organizimin e zgjedhjeve të reja parlamentare.

Marrëveshja Vetëvendosje-PDK

Reuters e lidh zgjedhjen e Shiroka-Pulës me një marrëveshje të arritur në momentet e fundit ndërmjet Lëvizjes Vetëvendosje dhe Partisë Demokratike të Kosovës.

Marrëveshja përfshiu edhe miratimin e ndryshimeve në Ligjin për Dhomat e Specializuara të Kosovës, të cilat Kuvendi i miratoi me 88 vota, para votimit për presidenten.

Sipas RFE/RL, ndryshimet e miratuara parashohin kufizimin e juridiksionit të Dhomave të Specializuara, një kufi prej 15 vitesh për dënimet me burgim dhe mundësinë që dënimet të vuhet në Kosovë. Ato parashohin gjithashtu mundësi për falje presidenciale për personat me aktgjykime të formës së prerë.

Ndryshimet kufizojnë edhe periudhën kohore që mbulohet nga juridiksioni i gjykatës, ndërsa ekspertë juridikë kanë ngritur pikëpyetje për përputhshmërinë e tyre me Kushtetutën dhe obligimet ndërkombëtare të Kosovës, raporton RFE/RL.

Kandidatura u bë publike në një transmetim televiziv

Një nga elementet që ka tërhequr vëmendje në raportimet ndërkombëtare është mënyra se si Shiroka-Pula e mësoi për kandidaturën e saj.

Sipas Al Jazeera Balkans, ajo mësoi se ishte propozuar për Presidente gjatë një lidhjeje të drejtpërdrejtë televizive në Dukagjini.

Emri i saj ishte propozuar nga kryeministri Albin Kurti në orët e vona të së martës. Kryetari i PDK-së, Bedri Hamza, e pranoi kandidaturën e saj dhe propozoi Eliza Hoxhën si kandidate kundërshtare.

Sipas RFE/RL, Shiroka-Pula kishte qenë më herët anëtare e PDK-së.

Protestat dhe tensionet rreth Speciales

Procesi politik u zhvillua në një atmosferë të tensionuar për shkak të kundërshtimeve ndaj ndryshimeve në ligjin për Dhomat e Specializuara.

Më 5 tetor, policia përdori gaz lotsjellës dhe ujëhedhës për të shpërndarë protestuesit jashtë ndërtesës së Kuvendit. Reuters raportoi se të paktën 17 persona u lënduan, përfshirë gjashtë pjesëtarë të Policisë së Kosovës, ndërsa tre protestues u arrestuan.

Tensionet u rritën pas vendimit të Dhomave të Specializuara të 16 shtatorit ndaj ish-presidentit Hashim Thaçi dhe tre ish-krerëve të tjerë të UÇK-së. Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet. Të dënuarit kanë apeluar vendimin.

Kush është presidentja e re?

Justina Shiroka-Pula, e lindur më 1953, është ekonomiste dhe akademike. Ajo ka shërbyer si ministre e Ekonomisë nga viti 2008 deri më 2011 dhe më pas si deputete e PDK-së.

Para zgjedhjes në postin e presidentes, ajo drejtonte Akademinë e Shkencave dhe të Arteve të Kosovës.

Me zgjedhjen e saj, Shiroka-Pula bëhet presidentja e tretë grua e Kosovës që nga shpallja e pavarësisë.

Associated Press e përshkruan kandidaturën e saj si një kompromis të minutës së fundit ndërmjet partisë në pushtet dhe PDK-së.

Posti i presidentes së Kosovës është kryesisht ceremonial, por përfshin kompetenca në politikën e jashtme dhe rolin e komandantes supreme të Forcës së Sigurisë së Kosovës.

Sipas Associated Press, Shiroka-Pula gjithashtu duhet ta dekretojë ndryshimin e ligjit për Dhomat e Specializuara në mënyrë që ai të hyjë në fuqi.

Pas betimit, presidentja e re deklaroi se e pranonte detyrën “me nder të madh dhe përgjegjësi të plotë”, duke theksuar se mandati i saj nuk i përket vetëm një personi, por qytetarëve, institucioneve dhe shtetit./Albinfo.ch

---