Serbët nga Kosova votojnë në Serbi, jo në Kosovë

Serbët nga Kosova do të votojnë në Serbi për zgjedhjet parlamentare

Votuesit nga Kosova që kanë të drejtë vote në zgjedhjet parlamentare të Serbisë, të cilat do të mbahen më 25 tetor, nuk do të votojnë në territorin e Kosovës. Komisioni Republikan i Zgjedhjeve (KRZ) ka vendosur që votimi për ta të organizohet në katër qytete në Serbi: Vranjë, Rashkë, Kurshumli dhe Tutin, përcjell albinfo.ch.

Sipas ndarjes së përcaktuar nga KRZ-ja, votuesit nga Rajoni Administrativ i Kosovës-Pomoravljes do të votojnë në Vranjë.

Votuesit nga Rajoni Administrativ i Mitrovicës së Kosovës, me përjashtim të atyre nga komunat e Zubin Potokut dhe Vushtrrisë, do të votojnë në Rashkë.

Në Kurshumli do të votojnë votuesit nga Rajoni Administrativ i Kosovës, si dhe ata nga komuna e Vushtrrisë.

Ndërkaq, votuesit nga rajonet administrative të Pejës dhe Prizrenit do të votojnë në Tutin. Në këtë qytet do të votojnë edhe votuesit nga komuna e Zubin Potokut.

Komisionet lokale zgjedhore për Prishtinën, Gjilanin, Gorën, Mitrovicën e Kosovës dhe Pejën janë ngarkuar që, në bashkëpunim me autoritetet përkatëse lokale në Serbi, t’i përcaktojnë qendrat konkrete të votimit. Sipas njoftimeve të publikuara, kjo duhet të bëhet më së voni deri më 7 tetor.

Vendimi i KRZ-së vjen në kuadër të organizimit të zgjedhjeve të jashtëzakonshme parlamentare të Serbisë, të cilat do të mbahen më 25 tetor 2026.

Sipas praktikës së aplikuar që nga viti 2022, votuesit nga Kosova që marrin pjesë në zgjedhjet e Serbisë i ushtrojnë të drejtat e tyre zgjedhore në qendra votimi jashtë Kosovës. Më herët, procesi ishte organizuar përmes mbledhjes së votave nga OSBE-ja në Kosovë dhe transportimit të tyre në Serbi për numërim.

Në të njëjtën mbledhje, KRZ-ja shpalli edhe listën zgjedhore “Koalicioni Shqiptar”, duke i njohur statusin e listës së pakicës kombëtare për zgjedhjet e 25 tetorit.

Lista përbëhet nga disa parti politike shqiptare dhe ka gjithsej 10 kandidatë./Albinfo.ch

---