Mesazh paqeje dhe shprese nga Ipeshkvi Dodë Gjergji në festën e Pashkëve

Foto: Kosovapress

Në atmosferën e kremtimit të Pashkëve, Ipeshkvi i Dioqezës Prishtinë-Prizren, Dodë Gjergji, ka përçuar një mesazh të fuqishëm paqeje, shprese dhe pajtimi gjatë meshës qendrore të mbajtur mbrëmë në Katedralen “Shën Tereza” në Prishtinë, shkruan albinfo.ch.

Në fjalimin e tij para besimtarëve, ipeshkvi Gjergji u bëri thirrje qytetarëve që këtë festë të madhe ta kremtojnë me lutje për paqe dhe zemra të mbushura me gëzim, duke theksuar nevojën për unitet dhe mirëkuptim në një botë të trazuar.

“Edhe pse kjo Pashkë na gjen në një botë të përgjakur, në një Evropë të përçarë dhe në një Kosovë që rënkon nën barrën e papërgjegjësisë politike, pasigurisë për të ardhmen dhe ndarjeve të panevojshme, jemi të ftuar të ruajmë qetësinë e shpirtit, shkëlqimin e shpresës dhe ngushëllimin e fesë,” u shpreh Ipeshkvi.

Ai theksoi se Pashkët nuk janë vetëm një festë kalendarike, por një përjetim i gjallë i shpresës së ringjalljes dhe një thirrje për t’u përballur me sfidat e kohës përmes dashurisë dhe së vërtetës, shkruan albinfo.ch.

“Kjo nuk do të thotë të heshtim përballë së keqes, por ta përballojmë atë me dashuri, ta sfidojmë me forcën e së vërtetës dhe çështjen tonë t’ia besojmë Zotit, sepse kështu i ka hije bijve të Dritës,” tha ai, duke shprehur lutjen që kjo Pashkë të jetë një fillim i ri për paqe dhe pajtim mes njerëzve.

Sot, në Ditën e Pashkëve, mesha për besimtarët katolikë u mbajt në orën 11:00 në Katedralen “Shën Nënë Tereza”, ndërsa në orën 19:00, Ipeshkvi Gjergji do të organizojë një pritje solemne në Qendrën “BogdaniPolis”, ku pritet të marrin pjesë personalitete fetare, politike dhe shoqërore.