Mezi po presim ta vendosim ligjin edhe në veri, thotë Sparks

Sipas tij, sundimi i rendit dhe ligjit duhet të shtrihet edhe në këtë pjesë të Kosovës.

Zëvendës shefi i misionit EULEX, Endy Sparks, ka deklaruar se zgjidhja e problemeve në veri pas vendosjes së barrikadave nga serbët e rebeluar duhet të bëhet me mjete paqësore.

Sipas tij, sundimi i rendit dhe ligjit duhet të shtrihet edhe në këtë pjesë të Kosovës.

“Sot është shi, moti i ftohtë dhe mua me të vërtetë më vjen keq për njerëzit që qëndrojnë afër barrikadave. Unë mendoj se ata po frikësohen për të ardhmen e tyre, por them se ata nuk kanë pse të frikësohen për këtë gjë, sepse sundimi i ligjit do të funksionalizohet në çdo pjesë të Kosovës dhe ne mezi presim që ta vendosim ligjin edhe në veri”, ka deklaruar Sparks.

Ai këto komente i bëri të shtunën gjatë një vizite që së bashku me Përfaqësuesin Special të Zyrës Ndërkombëtare Civile në Kosovë, Pieter Feith, i bën qytetit të Pejës, ku kanë arritur me tren në kuadër të turneut të trashëgimisë kulturore.

Feith ka thënë se kjo vizitë është një mundësi e mirë për t’u njohur për së afërmi me trashëgiminë kulturore të Dukagjinit.