Minatorët e ngujuar në Trepçë, jashtë rrezikut për jetën

Më shumë se 100 minatorë të ndërmarrjes Trepça kanë mbetur të ngujuar nëpër horizontet e minierave, pasi është djegur një trafo që ndodhet në Parkun e biznesit në Mitrovicë. 

KEDS njofton se ka dërguar ekipet në vendin e ngjarjes, në mënyrë që të tejkalohet situata.

 “KEDS ka arritur të rikthejë energjinë elektrike për rreth 2/3 e konsumatorëve të Mitrovicës, duke e kaluar furnizimin nga linjat që vijnë nga Vushtrria, ndërsa nuk ka alternativë për konsumatorët që furnizohen nga Trepça dhe linja e KOSTT-it në Shupkofc, përkatësisht një pjesë e Mitrovicës dhe fshatrat afër, nga Mitrovica në drejtim të Vushtrrisë”, thuhet në komunikatë, përcjell albinfo.ch

Ndërsa kryetari i Sindikatës së punëtorëve në Stantërg, Shyqyri Sadiku, ka thënë për mediat në Kosovë se janë duke bërë përpjekje që përmes lidhjeve elektrike alternative të mundësohet dalja e minatorëve. Ai ka thënë se ata janë jashtë rrezikut për jetën.