Ministri Gashi premton zgjidhje për problemin e ujërave të zeza në TKK

Ministri ka thënë se do të takohet me njerëz kompetentë dhe me kryetarin e Komunës së Prishtinës, Shpend Ahmeti, për ta eliminuar këtë problem

Ministri i Kulturës, Kujtim Gashi, gjatë inspektimit të objektit të teatrit është njoftuar për problemet që ka ky institucion kulturor. E, ndër problemet janë ujërat e zeza, me të cilin po përballet prej kohës që është rregulluar sheshi në qendër Prishtinës.

Ministri ka thënë se do të takohet me njerëz kompetentë dhe me kryetarin e Komunës së Prishtinës, Shpend Ahmeti, për ta eliminuar këtë problem. Ai tha se do ta shqyrtojnë buxhetin dhe do të ndahen mjete për rregullimin e problemeve që ka ky institucion i kulturës.

Ushtruesja e detyrës së drejtorit të Teatrit Kombëtar, Kumrije Hoxha, deklaroi se gjendja brenda objektit është jo e mirë. Ajo tregoi se një punëtor teknik i këtij institucioni kujdeset për ta zbrazur ujin që është i grumbulluar në bodrumet e teatrit.