Ministria e Shëndetësisë u bën thirrje mjekëve nga mërgata të punojnë në Kosovë

Ministria e Shëndetësisë e Republikës së Kosovës u bën ftesë të gjithë specialistëve të fushave të ndryshme mjekësore që kanë interes për angazhim dhe punë në institucionet shëndetësore publike të Kosovës.

Ftesa u drejtohet specialistëve të fushave mjekësore, pjesëtarë të mërgatës shqiptare, atyre nga rajoni, por dhe profesionistëve të huaj mjekësorë, thuhet në njoftim.

“Bashkëpunimi profesional në institucionet tona ka ekzistuar dhe aktualisht është duke marrë ritëm të ri. Por, në mënyrë që ky bashkëpunim të thellohet e dinamizohet ju ftojmë të shprehni interesimin tuaj për të ndihmuar vendin dhe sektorin krah për krah me kolegët që me mundin e dijen e tyre sigurojnë shërbimet në të gjitha nivelet. Të gjithë të interesuarit që kanë përvojë të konsiderueshme pune në lëmenjtë ku veprojnë dhe veçanërisht ata që kanë dhe përvojë akademike, u lutemi të na drejtohen”, bën ftesë Ministria e Shëndetësisë, përcjell albinfo.ch.

Për angazhimin e tyre do të bëhen marrëveshje me institucionet shëndetësore ose Ministrinë e Shëndetësisë.

Angazhimi i profesionistëve shëndetësorë nga mërgata dhe jashtë vendit do të respektojë kushtet e Udhëzimit Administrativ (QRK) nr. 10/2022 për licencimin e profesionistëve shëndetësorë të huaj dhe aktet e tjera ligjore në fuqi, përcjell albinfo.ch.

Njoftimin tuaj për angazhim mund ta dërgoni në adresën e-mail: Msh.Aplikimi@rks-gov.net