Mislim Berisha shpall kandidaturën për Këshillin Bashkiak në Augsburg

Një tjetër sukses i mërgatës kosovare në Gjermani, shqiptari synon përfaqësim në zgjedhjet lokale të 8 marsit

Një numër gjithnjë e më i madh i mërgimtarëve nga Kosova në Gjermani po shënojnë arritje të rëndësishme në fusha të ndryshme të jetës shoqërore, ekonomike dhe politike. Së fundmi, një tjetër kosovar ka bërë hapin drejt angazhimit politik, duke shpallur zyrtarisht kandidaturën e tij për Këshillin Bashkiak në Augsburg, në Gjermani, shkruan albinfo.ch.

Bëhet fjalë për Mislim Berishën, i cili do të garojë në zgjedhjet komunale që do të mbahen më 8 mars, zgjedhje këto që zhvillohen në disa lande të Gjermanisë, përfshirë edhe qytetin e Augsburgut.

Berisha ka deklaruar se kandidatura e tij është pritur pozitivisht nga komuniteti lokal, duke theksuar se ka marrë përkrahje edhe nga qytetarë gjermanë. “Gjermanët po më përkrahin, uroj që edhe shqiptarët të më votojnë”, është shprehur ai, duke bërë thirrje për unitet dhe mbështetje nga bashkëkombësit që jetojnë në këtë qytet, shkruan tutje albinfo.ch.

Kandidimi i Mislim Berishës shihet si një hap i rëndësishëm drejt rritjes së përfaqësimit të komunitetit shqiptar në institucionet lokale të Gjermanisë dhe një dëshmi e integrimit të suksesshëm të mërgatës në shoqërinë gjermane.

Zgjedhjet e 8 marsit pritet të jenë vendimtare për përbërjen e re të këshillave bashkiakë, ndërsa kandidatura e Berishës konsiderohet si një zë i ri që synon të kontribuojë në zhvillimin dhe përfaqësimin e interesave të qytetarëve të Augsburgut./Albinfo.ch

---