MKRS-ja po e shkel ligjin me konkursin për drejtorin e QKK-së

Unioni i Artistëve të Filmit të Kosovës ka reaguar lidhur me konkursin për zgjedhjen e drejtorit të Qendrës Kinematografike të Kosovës. Ky union i është drejtuar me një letër ankesë Kryeministrit dhe ministrit të Kulturës lidhur me konkursin, siç e quaj ata, “skandaloz dhe të jashtëligjshëm”.
“Ministria e Kulturës, Rinisë dhe Sporteve ka hapur “konkurs të brendshëm” në ditët e festës për zgjedhjen e drejtorit të QKK-së duke shkelur Ligjin për Kinematografinë, i cili përcakton saktë se zgjedhja e drejtorit bëhet me konkurs publik dhe jo të brendshëm.

Konkursi me të drejtë aplikimi u referohet vetëm punëtorëve të MKRS-së dhe mbyllet më 05 janar të vitit 2018. Intenca e manipulimit dhe tendenca për të rizgjedhur në mënyrë të kundërligjshme ish-drejtorin Arben Zharku në krye të QKK-së është tepër transparente.

Por, fatkeqësisht kjo mënyrë, sikurse edhe zgjedhja e parë e Zharku në krye të QKK-së, rezulton si shkelje flagrante e ligjit. Duam t’ju përkujtojmë se Qendra Kinematografike e Kosovës është e themeluar me Ligjin nr. 2004/22 dhe i gjithë funksionalizimi i këtij institucioni mbështetet në Ligjin për Kinematografinë”, thuhet në reagimin e Unionit të Artistëve të Filmit.