Mot i përkryer për ndeshjen e parë të Zvicrës në Botëror, temperaturat deri në 30 gradë

Një valë moti veror pritet të përfshijë Zvicrën pikërisht në fundjavën kur Kombëtarja zvicerane nis aventurën në Kupën e Botës.

Tifozët zviceranë do të kenë kushte ideale për të ndjekur ndeshjen e parë të Kombëtares së Zvicrës në Kupën e Botës, pasi moti pritet të jetë plotësisht veror gjatë fundjavës, përcjell albinfo.ch.

Pas një të enjteje me vranësira, reshje të izoluara shiu dhe temperatura relativisht të ulëta për stinën, moti do të përmirësohet gradualisht duke filluar nga e premtja. Në pjesën lindore të vendit mund të ketë ende reshje të lehta në orët e paradites, por gjatë ditës pritet kthjellim i motit në pjesën më të madhe të Zvicrës.

Fundjava do të dominohet nga një zonë e fuqishme e presionit të lartë atmosferik, e cila do të sjellë mot të qëndrueshëm dhe me diell. Të shtunën temperaturat do të luhaten nga 26 deri në 29 gradë Celsius, ndërsa në kantonin e Valais dhe në Ticino termometri mund të arrijë deri në 30 gradë.

Kushtet atmosferike konsiderohen ideale për ata që planifikojnë ta ndjekin ndeshjen e Kombëtares zvicerane në ekranet gjigante të organizuara për tifozët ose në ambiente të hapura familjare.

Edhe dita e diel pritet të jetë kryesisht me diell. Në disa zona përgjatë Alpeve veriore mund të formohen vranësira lokale, por pa ndikim të madh në mot. Temperaturat maksimale do të arrijnë rreth 25 gradë Celsius.

Sipas parashikimeve, moti veror do të vazhdojë edhe gjatë javës së ardhshme, me temperatura që në disa rajone të Zvicrës mund t’i afrohen ose të kalojnë kufirin e 30 gradëve. /Albinfo.ch

---