Moti i keq përfshin Evropën

Në kantonin zviceran të Ticinos, shumë rrugë janë të pakalueshme, të përmbytura apo të bllokuara nga rrëzimi i pemëve

Vala e motit të keq ka gjunjëzuar disa shtete evropiane, ku vetëm në Itali regjistrohen 10 të vdekur, ndërsa dhjetëra-mijëra banesa në kontinent vijojnë mungesën e energjisë elektrike.

Në Austri, një pjesë e çative mesjetare që simbolizojnë shtëpitë e Salzburgut janë marrë nga erërat e forta që arritën shpejtësinë mbi 100 kilometra në orë, transmeton “ATSH”.

Më në jug, mbrojtja civile u bëri thirrje të hënën në darkë rreth 500 banorëve të Muhr të qëndronin në shtëpi dhe të qëndronin në katet e sipërme nga frika e rritjes së nivelit të lumenjve që kanë çuar në bllokimin e akseve në qytezë, përcjell albinfo.ch.

Në Slloveni vendi ka lëshuar ‘alarmin e kuq’ prej së hënës, një serfist rezulton i zhdukur, ndërsa në Kroaci, qyteti port i Rijekës është përmbytur dhe shumë linja hekurudhore janë ndërprerë.

Në kantonin zviceran të Ticinos shumë rrugë janë të pakalueshme, të përmbytura apo të bllokuara nga rrëzimi i pemëve.

Në Francë dëbora që ka rënë në qendër të vendit ka bllokuar më shumë se 2 000 automjete në Masivin Qendror dhe 200 000 shtëpi vuajnë mungesën e energjisë elektrike.

Në Korsikë, 21 000 shtëpi vazhdojnë të jenë pa energji elektrike, autoritetet po hartojnë bilancin e dëmeve të shkaktuara nga erërat e forta me shpejtësi mbi 160 kilometra në orë.

Në Spanjë reshjet e dëborës në Asturia (veri) kanë shkaktuar vështirësi në qarkullim, 4.700 banesa janë pa energji elektrike, sipas autoriteteve.

Në Republikën Çeke trafiku hekurudhor vijon të ketë vonesa sot në mëngjes pas erërave të forta që kanë shkaktuar rrëzimin e pemëve mbi linjat hekurudhore dhe rreth 30 000 persona janë pa energji elektrike, sipas kompanisë publike të energjisë elektrike CEZ.

---