Video rrëqethëse, mërgimtari bën aksident vdekjeprurës duke e xhiruar ‘live’ në “Facebook”

Një aksident që mund të ishte evituar i ka marrë jetën një shqiptari të Kosovës në Hungari.

45-vjeçari Beg Morina është treguar më aventurier seç duhet, teksa kishte dalë live në Facebook duke drejtuar automjetin e tij. Pikërisht nga përqendrimi i vëmendjes te celulari, 45-vjeçari nga Hasi i Prizrenit ka humbur edhe kontrollin e mjetit, duke u aksidentuar për vdekje.

Mësohet se Beg Morina punonte si picier në Hungari dhe në momentin kur ishte duke xhiruar një live-video në Facebook, po udhëtonte në një autostradë me shpejtësi të lartë.

Ndërkohë, kamera e celularit të tij ka xhiruar të gjithë aksidentin, ndërsa në momente dramatike dëgjohen edhe rënkimet e 45-vjeçarit dhe njerëzit të cilët kanë ndaluar për ta ndihmuar.

MPJ-ja, monitoron gjendjen e dy të mbijetuarve të aksidentit në Hungari

Ministria e Punëve të Jashtme për portalin Koha.net ka bërë të ditur se është duke monitoruar gjendjen shëndetësore të dy të mbijetuarve të aksidentit që ndodhi në Hungari në të cilën mbeti i vdekur shtetasi i Kosovës, B.M.

Fatmir Haxholli, këshilltar politik i ministrit Behgjet Pacolli, ka thënë për Koha.net se autoritetet hungareze kanë informuar misionin diplomatik e konsullor të Kosovës në Budapest lidhur me aksidentin i cili u transmetua “live” në Facebookun e tashmë të ndjerit B.M.

“Me automatizëm, personeli ynë diplomatik e konsullor është përfshirë në komunikim dhe bashkëveprim të vazhdueshëm me autoritetet hungareze, si dhe ka komunikuar gjatë gjithë ditës me familjarët e të aksidentuarve, shkruan koha.net, përcjell albinfo

Shërbimi ynë konsullor në Budapest informon që autoritetet hungareze pritet të dalin me raport përfundimtar, në lidhje me rrethana e aksidentit”, ka thënë Haxholli.

“Në ndërkohë konform përgjegjësive konsullore, personeli diplomatik i Kosovës në Budapest, do të komunikojë me qendrën spitalore në lidhje me gjendjen dhe kujdesin në kuadër të trajtimit intensiv të dy qytetarëve të lënduar. Ministri Pacolli, si dhe personeli i Ministrisë së Punëve të Jashtme, i shprehin ngushëllimet familjes, e cila humbi familjarin e saj në këtë aksident, përderisa lutemi për shëndetin e dy të lënduarve dhe shërimin e tyre sa më të shpejtë”, ka thënë ai.