Muaji pa duhan fiton vëmendje në Zvicër

Keystone

Më shumë se 10,000 njerëz janë regjistruar për një nëntor pa duhan në Zvicër këtë vit.

Fushata është krijuar për të inkurajuar duhanpirësit të lënë duhanin – në mënyrë ideale për mirë – me ndihmën e një komuniteti motivues.

Muaji i parë pa duhan konsiderohet se është më i vështiri. Më shumë se një e katërta e njerëzve në Zvicër ende pinë duhan, transmeton albinfo.ch.

Për ta bërë më të lehtë lënien e duhanit, ekziston një platformë shkëmbimi në internet dhe, ndër të tjera, një konsultë telefonike me ekspertë shëndetësorë.

Dëshmitë nga pjesëmarrësit janë gjithashtu të qasshme.

Regjistrimi falas bëhet përmes faqes së internetit rauchfreiermonat.ch. Programi ofrohet në gjermanisht, frëngjisht, italisht dhe anglisht, përcjell albinfo.ch.

Fushata Muaji pa duhan, tashmë në vitin e saj të dytë, mbështetet nga Fondi për Parandalimin e Duhanit të qeverisë federale. Janë të përfshira disa agjenci dhe organizata kantonale, duke përfshirë Ligën Zvicerane të Kancerit dhe Ligën Zvicerane të Mushkërive.