Murad: Gjenocidi, ende i pranishëm

Laureatja e çmimit Nobel për Paqe dhe aktivistja e komunitetit jazidi, Nadia Murad, ka paralajmëruar se gjenocidi është ende kërcënim dhe shkatërrimi ndodh për shumë komunitete në Irak dhe Siri.

Duke folur në ceremoninë e ndarjes së çmimit në Oslo, ku e pranoi Nobelin e saj, Murad ka thënë se edhe qeveria e saj, edhe bashkësia ndërkombëtare kanë dështuar të mbrojnë komunitetin jazidi.

“Qëllimi i ISIS-it ishte të fshinte gjithë këtë religjion, e kështu është rasti edhe me shumë komunitete të tjera në Irak dhe Siri. Pasi Qeveria irakiane dështoi të na mbronte, dështoi edhe bashkësia ndërkombëtare. Por, duhet të përpiqemi të mos lejojmë që gjenocidi të ndodhë prapë”, tha ajo ndër tjera.

Murad është bashkëlaureate e shpërblimit për vitin 2018. Ajo aktivitetin e saj e filloi pasi shpëtoi nga kthetrat e ISIS-it, anëtarët e së cilës organizatë terroriste e kishin skllavëruar në Mosul në vitin 2014.