Mustafa: Ligji për paga u miratua vetëm për vota

Kryetari i Lidhjes Demokratike të Kosovës, partisë më të madhe opozitare, Isa Mustafa, ka vazhduar me kritika për koalicionin qeverisës lidhur më miratimin e Ligjit për paga që do t’i kushtojë buxhetit të Kosovës rreth 120 milionë euro, e që po kundërshtohet edhe nga FMN-ja.

Ai nëpërmjet një statusi në Facebook ka thënë se të  gjithë ata që po flasin për këtë nuk marrin vesh nga buxheti e ekonomia, por, sipas tij, po flasin për vota.

“Sipas kësaj bie se jemi më të zotët, më të diturit, më të mirët! Të tjerët në regjion, që janë më të zhvilluar sesa ne, nuk po dinë t’i rrisin pagat. Asnjëri prej tyre nuk flet për faktin se jemi vendi më i varfër në Evropë dhe në regjion, se mezi arrijmë të mbulojmë importin me 10 për qind eksport, se pagat në sektorin privat, ku kemi trefishin e të punësuarëve në krahasim me sektorin publik, janë shumë më të ulëta; jemi vendi me shkallën më të lartë të papunësisë prej rreth 30%, kurse nga rreth 2 miliardë të hyra buxhetore, mbi 1.4 miliard janë destinuar për paga dhe transfere sociale, duke ul kapacitetin për investime dhe zhvillim”, ka shkruar Mustafa.

Kryetari i LDK-së ka shtuar se nuk beson se Gjykata Kushtetuese do ta shpall këtë vendim si antikushtetues, sepse thotë se vetë Gjykata është më shumë jokushtetuese sesa kushtetuese.