Nafta arrin rekord në Zvicër, 2.41 franga për litër: Pritet të ndikojë edhe në çmimet e tjera

Rritja e kostove të energjisë dhe transportit mund të reflektohet gradualisht edhe në çmimet e mallrave dhe shërbimeve të tjera

Çmimi i naftës ka arritur një nivel rekord në Zvicër. Sipas të dhënave të Touring Club Switzerland (TCS), çmimi mesatar në nivel kombëtar ka arritur në 2.41 franga për litër, duke tejkaluar rekordin e mëparshëm prej 2.30 frangash të regjistruar në vitin 2022.

Rritje ka shënuar edhe benzina pa plumb 95, e cila aktualisht kushton mesatarisht 2.10 franga për litër.

Pas rritjes së fortë të çmimeve qëndrojnë disa faktorë. Rafineria e Cressier, e cila mbulon rreth 30 për qind të nevojave të Zvicrës, ka qenë jashtë funksionit për dy javë për shkak të një problemi teknik, transmeton albinfo.ch.

Situata është rënduar edhe nga niveli i ulët i ujit në lumin Rhine, që ka rritur ndjeshëm koston e transportit të karburanteve. Sipas TCS-së, transporti nga Roterdami në Bazel aktualisht kushton mbi 220 franga për ton, krahasuar me vetëm 22 deri në 28 franga në kushte normale. Vetëm kjo rritje e kostos së transportit vlerësohet se shton rreth 15 cent në çmimin e një litri karburant.

Në rritjen e çmimeve po ndikojnë gjithashtu tensionet gjeopolitike dhe problemet me kapacitetet e rafinimit.

Boris Martinoni, zëdhënës i Shoqatës së Pikave të Karburantit në Ticino, paralajmëron se pasojat nuk do të kufizohen vetëm te shoferët. Rritja e kostove të energjisë dhe transportit mund të reflektohet gradualisht edhe në çmimet e mallrave dhe shërbimeve të tjera.

Në këtë situatë janë shtuar edhe kërkesat për ndërhyrje nga Këshilli Federal. Një nga mundësitë e përmendura është ulja e përkohshme e akcizave mbi karburantet.

Rritja po prek gjithashtu vajin për ngrohje. Për familjet që përdorin këtë lloj ngrohjeje, zhvillimet në tregun ndërkombëtar të energjisë dhe kostot e transportit mund të ndikojnë drejtpërdrejt në shpenzimet gjatë sezonit të dimrit.

---