Ndërprerja e bisedimeve Kosovë-Serbi pas vrasjes së Ivanoviqit, konsiderohet veprim i gabuar

Analistët vlerësojnë se anulimi i bisedimeve Kosovë – Serbi në Bruksel, për shkak të vrasjes së liderit serb Oliver Ivanoviq, më 16 janar, është veprim i gabuar.

Sipas tyre, edhe Kosova mund të kërkojë në shumë raste ndërprerjen e dialogut, por kjo s’i kontribuon asnjërës palë.

Për analistin Naim Rashiti kjo është një kthesë e keqe, në procesin e dialogut në periudhën kur po përgatitej një fazë ndoshta finale e bisedimeve Kosovë-Serbi.

“Është një situatë paradoksale në procesin e dialogut por edhe me qasjen e faktorit ndërkombëtar të BE-së. Në njërën anë pritet për një proces të fazës finale ashtu siç proklamohet edhe në Strategjinë e Zgjerimit të BE-së por në anën tjetër tensione e  diskursi i acaruar vazhdojnë. Diçka nuk është në rregull me këtë situatë, prandaj duhet të krijohet një situatë e re më normale, një përgatitje më të mirë, për një kornizë më të qartë për procesin e dialogut”, deklaroi Rashiti, raporton RTK.

Nenad Maksimoviq drejtor i organizatës joqeveritare “Qendra për Paqe dhe Tolerancë” në Graçanicë, thotë se vrasja e Ivanoviqit ishte vrasje e ideve ndryshe dhe alternativave të ndryshme politike. Maksimoviq thotë se ndërprerja e dialogut si pasojë e vrasjes së Ivanovicit është absolutisht e panevojshme sepse kjo vrasje s’ka lidhje me dialogun.

 “Mendoj se është në pyetje një lojë e politikës ditore, ku rëndësia më e madhe sesa e një individi, është të vazhdojë dialogu, por në nivel presidentësh”, deklaroi Maksimoviq.

Për politologun Belul Beqajn – Beogradi zyrtar me këtë veprim në një mënyrë e privatizoi çështjen Ivanoviq. Bleqaj  vlerëson se Beogradi nuk ka arsye të privatizojë atentatin ndaj Ivanoviqit sepse, sipas kësaj logjike edhe pala kosovare mund ta konsiderojë vrasjen e tij – arsye për ndërprerje të bisedimeve e që do duhej që dialogu të mos varet nga kjo. Në të kundërtën, Beqaj tha se ky rast do të duhej të ishte arsyeja për vazhdimin e dialogut në mënyrë që të dyja palët të pajtohen dhe të gjendet një zgjidhje për të dalë nga kjo situatë.