Ndërpriten bisedimet bërthamore me Iranin në Vjenë

Mësohet se raundi i fundit i bisedimeve me Iranin që synonte të shpëtonte marrëveshjen bërthamore të vitit 2015, të premten, më 17 dhjetor, u shty mes pyetjeve të ngritura nga mbikëqyrësi bërthamor i OKB-së rreth zhdukjes së regjistrimeve të kamerave të vëzhgimit në një kompleks bërthamor iranian.

Enrique Mora, i dërguar i Bashkimit Evropian dhe koordinator i bisedimeve, tha se marrëveshja duhet të përfundojë sa më shpejt.

“Nuk mund të presim me muaj, marrëveshja duhet të arrihet brenda javësh”, tha Mora para gazetarëve në fund të raundit të shtatë të bisedimeve.

“Ka një ndjenjë të urgjencës, që është absolutisht e rëndësishme nëse duam të kemi vërtet sukses në këto bisedime”, shtoi ai.

Më 2015 Irani arriti marrëveshjen bërthamore së bashku me Britaninë, Kinën, Francën, Gjermaninë, Rusinë dhe Shtetet e Bashkuara. Marrëveshja kishte për qëllim frenimin e programit bërthamor të Iranit, në këmbim të lehtësimit të sanksioneve.

Por, më 2018, presidenti i atëhershëm i SHBA-së, Donald Trump, e tërhoqi Uashingtonin nga marrëveshja dhe rivendosi sanksione ekonomike, duke shtyrë Iranin që të nisë të shkelë pikat e marrëveshjes.

Kjo marrëveshje lehtësoi sanksionet ekonomike në këmbim të frenimit të programit bërthamor të Iranit në 10 deri në 15 vjetët e ardhshme.

Irani gjithmonë ka insistuar se programi i tij bërthamor ka qëllime paqësore.