Në pritje të Qeverisë, Haziri: Duam kreun e Kuvendit

Ilustrim

Kanë mbetur edhe dy ditë deri në seancën plenare për votimin e Qeverisë, e LDK dhe LVV thonë se do të tentojnë deri në momentet e fundit për arritjen e marrëveshjes.

Kryetari i LDK-së, Isa Mustafa, gjatë së shtunës ka zhvilluar një takim me anëtarët e ngushtë të Kryesisë, pas së cilit nënkryetari Lutfi Haziri njoftoi se pengesa e kryeparlamentarit ende nuk është tejkaluar.

Haziri tha se është duke u punuar për tejkalimin e pengesave, megjithëkëtë, sipas tij, parimi kryesor i bisedimeve duhet të jetë përfaqësimi i barabartë.

Ai tha se liderët e partive janë në kontakt të vazhdueshëm, por ende s’është caktuar ndonjë takim.

Në anën tjetër, anëtar të LVV-së i kanë bërë thirrje LDK-së që të dorëzohet në kërkesën për të parin e Kuvendit.
Seanca plenare për votimin e Qeverisë së re të propozuar nga i mandatuari për kryeministër, Albin Kurti, do të mbahet të hënën në orën 11.

E përveç me LDK-në, VV-ja ende është duke diskutuar me pakicën parlamentare për përfshirjen e tyre në Qeveri, përcjell Albinfo.ch.