Në Gjakovë filloi festivali i “Sofrës”

E reja dhe e vjetra takohen në "Lamën e Drithit" në Gjakovë nën tingujt e muzikës. Kjo festë është bërë tradicionale me ardhjen e bashkatdhetarëve  

Një prej aktiviteteve më të këndshme verore, filloi mbrëmë në atë që vetë gjakovarët e quajnë “Lomën e Drithit”, e cila bashkon në një eveniment të rinjtë dhe të vjetrit e Gjakovës, duke ndarë bashkë kulturën, muzikën dhe veshjet tradicionale shqiptare dhe ato të reja-avangarde.

Festivali i Sofrës, sipas organizatorëve, është gërshetim i kultivimit të traditës gjakovare kulturore dhe kulinare dhe pasurim me krijimtarinë e re.

“E reja dhe e vjetra takohen në Lamën e Drithit në Gjakovë nën tingujt e muzikës që mishëroi repertoarin e muzikës shqiptare. Kënaqësi të mirëpresim bashkatdhetarët tanë nga e gjithë Evropa dhe Amerika që ishin mbrëmë prezent”, thuhet në njoftimin e Komunës së Gjakovës, të cilin e transmeton Albinfo.Ch.

Falënderim i veçantë, sipas tyre, shkon për ministrin e Diasporës Valon Murati për përkrahjen që ia dha festivalit dhe prezencen e tij me bashkëpunëtorë mbrëmë në Gjakovë. Festivali vazhdon edhe sonte me muzikë, ushqim dhe atmosferë që dinë ta mbajnë dhe prezantojnë vetëm gjakovarët.

“Eja edhe ti për një përjetim të veçantë në Gjakovë”, shkruan në njoftimin e komunës.