Në Kosovë ekziston dëshira e madhe për ta mësuar gjermanishten

Kryeministri Ramush Haradinaj tha se në Kosovë ekziston një dëshirë e madhe për ta mësuar gjuhën gjermane. “Edhe unë kam qejf ta mësoj”, tha ai

Në Kosovarë ekziston një dëshirë e madhe për të mësuar gjuhen gjermane, dhe kjo është dëshmuar tashmë. Kështu deklaroi kryeministri i Republikës së Kosovës, Ramush Haradinaj  në një ceremoni organizuar nga Ambasada e Gjermanisë në Kosovë  me rastin e hapjes së Qendrës “Goethe”. Haradinaj tha se ka dëgjuar për institutin “Goethe” në të kaluarën dhe sot po e njeh më shumë.

“Ne si Kosovë dhe qytetarët tanë jemi të etur për kulturën e popujve dhe këtë e kemi dëshmuar me aftësinë tonë për të mësuar gjuhën. E di që në Kosovë ekziston një dëshirë e madhe për ta mësuar gjuhën gjermane. Edhe unë kam qejf ta mësoj. Gjuha gjermane është prezentë në Kosovë, plotë e flasin, por ka plotë të tjerë që kanë qejf ta mësojnë gjuhën e Gëtes, Ajnshtajnit, Mozartit, Hegelit, gjuhën e plotë njerëzve që i njeh bota”, tha kryeministri Haradinaj.

Për ta kuptuar një popull, kryeministri Haradinaj tha se mënyra më e drejtë është me fol gjuhën.

Kryeministri falënderoi institutin “Goethe” për ndihmën e dhënë për mësimin e gjuhës gjermane, njohjen e  popullit gjerman, gjuhën, kulturën dhe vlerat e popullit gjerman. “Ne këtë e marrim edhe si ndihmë edhe si respekt për Kosovën andaj edhe ne do të jemi mirënjohës për këtë”, tha kryeministri Haradinaj.

Të pranishëm në këtë ceremoni ishin edhe zëvendëskryeministri i Kosovës, Enver Hoxhaj, ambasadorë dhe përfaqësues të tjerë.