Në Kosovë ende hyjnë produkte serbe

Foto Ilustrim

Qeveria e Kosovës para 11 muajve vendosi taksën 100 për qind për importet nga Serbia dhe Bosnjë e Hercegovina.

Për këtë vendim ka mendime të ndryshme sa i përket planit ekonomik dhe atij politik, në kuptmin pozitiv dhe negative. Kjo sepse, sipas njohësve të ekonomisë, e ka rënduar xhepin e konsumatorëve me çmime të produkteve dukshëm më të larta.

Meqenëse taksa thuhet se është 100% ndaj produkteve serbe dhe boshnjake, këto të fundit janë ende të pranishme në dyqanet kosovare. Mungesa e produkteve serbe nuk vërehet fare.

Ministri i Zhvillimit Ekonomik, Valdrin Lluka, në një intervistë për Ekonomia Online, ka thënë se taksa 100% për produktet serbe e boshnjake ka pasur efekt në aspektin politik e ekonomik, por mbetet shqetësues fakti se në Kosovë ende hyjnë produkte serbe, të cilat, sipas tij, nuk kanë as rritje të çmimit.

“Taksa ka qenë momenti i duhur për shkak të presioneve të mëdha të Serbisë ndaj Kosovës dhe ndaj partnerëve tanë dhe ndaj tërheqjeve të njohjeve dhe mosanëtarësimit në organizata të ndryshme, vendimi i taksës ka qenë shumë i duhur politikisht, mirëpo pjesa më shqetësuese është që kemi produkte prezent të Serbisë që vijnë në Kosovë, por nuk kanë rritje të çmimit, disa prej tyre pak kanë pasur, por ideja është sa jemi në situatë për kontrollimin e këtyre produkteve që hyjnë në Kosovë, a po kontrollohen mirë origjina e produktit se nga vjen”, tha Lluka, përcjell albinfo.ch.