Në Prishtinë hapet festivali Olimpik Dimëror

Festivali Olimpik Dimëror promovon tri sporte: Patinazh, Kërling dhe Hokej në akull

Në qendër të Prishtinës, sot (e premte) është hapur Festivali Olimpik Dimëror, i cili ka për qëllim që ta promovojë Kosovën edhe në sportet dimërore. Anëtarja e Komitetit Olimpik të Kosovës, Shqipe Bajçinca-Brestovci tha se festivali Olimpik Dimëror promovon tri sporte: Patinazh, Kërling dhe Hokej në akull.

“Sot  është hapja solemne e lojërave olimpike dimërore në PyongChang të Koresë dhe Kosova ne mesin e 9 shteteve organizon festivalin olimpik ku promovohen tri sporte dimërore, patinzhi, korlingu dhe hokej në akull dhe ky është aktiviteti ku Kosova e promovon vetën dhe njëkohësisht është edhe pjesëmarrëse në lojërat olimpike dimërore ”, tha ajo, citon KPress.

Bajçinca-Brestovci bëri të ditur se ky aktivitet mbështetet edhe nga Komiteti Olimpik Ndërkombëtar, i cili sjellë edhe një ekspert të sportit Hokej meqë në Kosovë mungon një profil i tillë. Sipas saj, pjesëmarrës në këtë festival mund të jenë të gjithë qytetarët që kanë dëshirë të merren me patinazh dhe është pa pagesë.

“Të gjithë qytetarët kanë të drejt të vijnë, normal që është pa pagesë dhe ta praktikojnë sportin e patinazhit, kërling, ndërsa për sportin hokej në akull jemi duke e pritur edhe ekspertin me qenë se në Kosovë nuk kemi ekspert, kështu që pritet në vazhdim që të praktikohet edhe hokej në akull”, deklaroi ajo.