Në Shqipëri nis zyrtarisht regjistrimi i popullsisë

Regjistrimi i popullsisë ka nisur zyrtarisht në të gjithë Shqipërinë, ku rreth 12 mijë anketues të trajnuar nga Instituti i Statistikave, do t’i vizitojnë familjet në të gjitha zonat e vendit dhe do ta bëjnë mbledhjen e të dhënave.

Gjatë procesit të regjistrimit, i cili do të zgjasë deri më 21 tetor, shtetasit rezidentë në Shqipëri duhet të plotësojnë 40 pyetjet e pyetësorit, prej 32 faqesh.

Një familjar mund të përgjigjet dhe për të tjerët nëse ata nuk ndodhen në shtëpi.

Pyetjet janë të ndara në dy kategori. Pyetjet e para, që kanë të bëjnë me detyrim përgjigjeje, lidhen me identitetin e qytetarit, të dhënat mbi ndërtesën apo banesën e tyre, ndërsa pyetjet e dyta kanë të bëjnë me përkatësinë etnike e fetare, janë me dëshirë dhe nëse 5 për qind e shqiptarëve refuzojnë t’i përgjigjen, nuk mund të merren në konsideratë dhe si rrjedhojë nuk përfshihen në rezultatin final.

Procesi i regjistrimit, i cili llogaritet i 11-ti pas shpalljes së pavarësisë, do të kushtojë 14 milionë euro.

Rezultatet preliminare të regjistrimit të popullsisë pritet të publikohen në nëntor, ndërsa ato përfundimtare vitin e ardhshëm.