Në tetor, me pasaporta biometrike?

Është përzgjedhur kompania fituese për pasaportat biometrike dhe pajisja me pasaporta të tilla do të fillojë në tetor

Në takimin e dhjetë të Grupit Punues për Liberalizimin e Vizave (GPLV) me Bashkimin Evropian, Ministri i Punëve të Brendshme, Bajram Rexhepi ka thënë se Kosova meriton fillimin e dialogut për liberalizimin e vizave. Sipas tij, ky dialog do t’i përshpejtonte reformat në këto fusha si dhe në fushat tjera, thuhet në një komunikatë për medie të MPB-së.

Në takimin në fjalë janë prezantuar të arriturat më të reja të institucioneve të vendit lidhur me procesin e liberalizimit të vizave me BE-në.

Gjatë periudhës raportuese, institucionet vendore janë angazhuar në zbatimin e Strategjisë për re-integrimin e personave të riatdhesuar me ç’rast Bordi Ekzekutiv ka aprovuar më shumë se 30 kërkesa për ndihmë personave të riatdhesuar, ka thënë Rexhepi.

“Kosova meriton fillimin e dialogut për liberalizimin e vizave. Ky dialog do t’i përshpejtonte reformat në këto fusha si dhe në fushat tjera. Ne jemi duke zbatuar parakushtet rreth re-integrimit të personave të riatdhesuar siç edhe jemi duke i zbatuar edhe kriteret tjera. Pra, kemi të drejtë kur kërkojmë llogari dhe përgjegjësi nga të gjithë, pa dallim. Gjithashtu kemi të drejtë të kërkojmë hapjen e dialogut për liberalizim të vizave”, tha ministri Rexhepi

Ndërsa ministrja, Vlora Çitaku tha se ndonëse Kosova njëanshëm para dy vitesh ka adaptuar Udhërrëfyesin për liberalizimin e vizave, në këtë fazë të procesit ka shënuar shumë hapa përpara në raport me vendet e tjera të rajonit në këtë pikë të procesit.

“Megjithatë ne ende jemi duke e negociuar me Komisionin Evropian marrjen e Udhërrëfyesit, përkatësisht hapjen e dialogut për liberalizim të vizave. Sidoqoftë, reformat, punën e jashtëzakonshme më shumë se Komisionit Evropian, ia kemi obligim vetvetes dhe qytetarëve tanë”, tha ministrja Çitaku.

Ndryshe, drejtues të Ministrisë së Punëve të Brendshme citohet të kenë thënë se tashmë është përzgjedhur kompania fituese për pasaportat biometrike dhe se pajisja e qytetarëve të Kosovës me pasaporta të tilla do të fillojë muajin tetor, në rast se gjatë procedurave ligjore nuk haset në ndonjë parregullsi