Neglizhenca e AUV-së, po i mbyll fermat e Kosovës

Në vazhdimësi ka rënie të prodhimtarisë vendore të qumështit dhe mbyllje të fermave dhe tash në Kosovë prodhohen 20 milionë litra më pak qumësht sesa në vitin 2014

Fermerët e Kosovës thonë se i përkrahin plotësisht kërkesat dhe shqetësime e Shoqatës së Qumështoreve të Kosovës lidhur me papërgjegjësinë e Agjencisë së Ushqimit dhe Veterinës.

“Ekzistenca e 2500 fermerëve të Kosovës është rrezikuar vazhdimisht për shkak të mungesës së vullnetit të AUV-së për t’i trajtuar shkeljet që janë duke u bërë në sektorin e qumështit që sa e sa vjet nga prodhues dhe importues të papërgjegjshëm. Kjo problematikë nuk është e re dhe ne vazhdimisht kemi njoftuar organet relevante, por kjo rrezikon që të margjinalizohet pikërisht për shkak të mungesës së angazhimit të AUV-së që të mbrojë konsumatorin vendës nga rreziqet e produkteve me përmbajtje të dyshimtë”, thuhet në reagim.

Aty theksohet se në vazhdimësi ka rënie të prodhimtarisë vendore të qumështit dhe mbyllje të fermave dhe tash në Kosovë prodhohen 20 milionë litra më pak qumësht sesa në vitin 2014.

“I bëjmë thirrje Qeverisë së Kosovës se është momenti i fundit të ndërmarrë masa sa më shpejt në drejtim të funksionalizimit të AUV-së. Duhet të kihet parasysh se 2500 fermerë kosovarë nënkuptojnë 2500 familje kosovare dhe disa mijëra kosovarë të tjerë të punësuar në këto ferma”, thuhet në njoftim.