Nënshkruhet marrëveshja më e madhe pasluftës në Kosovë

Qeveria e Kosovës dhe “Contour Global” kanë nënshkruar sot marrëveshjen për Termocentralin “Kosova e Re”. Kjo është marrëveshja më e madhe e nënshkruar ndonjëherë, e cila kap vlerën e mbi 1 miliard eurove.

Presidenti i Kosovës, Hashim Thaçi, është shprehur i kënaqur me faktin se po nënshkruhet kontrata e një prej projekteve më të mëdha në Kosovë që nga paslufta, përcjell albinfo.ch.

Thaçi tha se kjo e tregon miqësinë dhe ndihmën që SHBA i ka dhënë Kosovës në faza të ndryshme të historisë.

Edhe kreu i Kuvendit, Kadri Veseli, tha se ky projekt do të ndihmojë në zhvillimin e vendit dhe tha se Kosova është shndërruar në vend potencial për investime të huaja.

Po ashtu, edhe kryeministri Ramush Haradinaj u shpreh i kënaqur që ky projekt po realizohet më në fund.

Ambasadori amerikan, Greg Delawie, tha se projekti i Kosovës së Re është një projekt i madh që do ta ndihmojë zhvillimin e Kosovës.

Ndërsa Joseph Brandt, themeluesi dhe drejtori ekzekutiv i kompanisë amerikane “Contour Global”, kompania fituese e tenderit për ndërtimin e TC Kosova e Re, tha se janë të gatshëm të shkojnë tutje me këtë projekt.

Në fund, u bë edhe nënshkrimi i kontratës komerciale mes shtetit të Kosovës dhe kompanisë amerikane “Contour Global”.