Nënshkruhet Protokolli për Ri-pranim të refugjatëve me Francën

Kjo marrëveshje është vazhdimësi e punës për integrime evropiane dhe përmbushjen e kritereve për Liberalizimin e Vizave

Ministri i Punëve të Brendshme, Bajram Rexhepi dhe ambasadori i Republikës së Francës në Kosovë, Jean Francois Fitou, kanë nënshkruar Protokollin e zbatimit të Marrëveshjes për Ri-pranim në mes të dy vendeve.

Kjo marrëveshje është vazhdimësi e punës së Ministrisë së Punëve të Brendshme, për integrime evropiane dhe përmbushjen e kritereve për Liberalizimin e Vizave.

Ministri Rexhepi falënderoi qeverinë e Republikës së Francës për përkrahjen dhe kontributin e vazhdueshëm në konsolidimin e shtetit të Kosovës.

“Në emër të Qeverisë së Kosovës, dua të falënderoj Republikën e Francës për kontributin e madh, në tërë proceset që kemi kaluar si shtet, sidomos tani në procesin për liberalizimin e vizave dhe integrimeve evropiane”, ka theksuar ministri Rexhepi.

Ndërsa ambasadori Fitou, ka deklaruar se nënshkrimi i këtij Protokolli është si rezultat i bashkëpunimit të mirë që ka Republika e Francës me Kosovën, në fushën e punëve të brendshme, përkatësisht në procesin e riatdhesimit.