Nëse dëmtohet Kosova, Maqedonia e Veriut tërhiqet nga Ballkani i hapur

Deklarata vjen nga ministri i Jashtëm i Maqedonisë së Veriut, Bujar Osmani

Nëse ndonjë shtet i rajonit do të dëmtohej nga nisma Ballkani i Hapur, Maqedonia e Veriut nuk do të jetë më pjesë e saj.

Ky është qëndrimi i ministrit të Punëve të Jashtme të Maqedonisë së Veriut, Bujar Osmani.
Sipas tij, iniciativa synon thellimin e bashkëpunimit mes shteteve të rajonit, por nuk do të jetë e plotë pa pjesëmarrjen e të gjashtë shteteve të Ballkanit Perëndimor”, përcjell Albinfo.ch.

Deklaratat e kryediplomatit Osmani vijnë gjatë një aktiviteti me ambasadorin e Kosovës në Shkup, Florian Qehaja, me rastin e 13-vjetorit të vendosjes së marrëdhënieve diplomatike mes dy vendeve.

“Ne, si Maqedoni e Veriut nuk do të lejojmë që ndonjë shtet tjetër të dëmtohet nga nisma e Ballkanit të Hapur. Nëse dikush do të dëmtohet, mendoj këtu edhe për Kosovën, atëherë ne nuk do të marrim pjesë në këtë nismë”, ishin fjalët e Osmanit.

Ballkani i Hapur është vazhdimësi e Mini-Shengenit ballkanik, e prezantuar në Novi Sad të Serbisë më 10 tetor të vitit 2019, nga liderët e Serbisë, Maqedonisë së Veriut dhe Shqipërisë. Kosova, Bosnjë e Hercegovina dhe Mali i Zi nuk janë pjesë e saj.

 

---