Nesër nënshkrimi i marrëveshjes LVV-LDK

Nesër pritet të nënshkruhet marrëveshja për koalicion qeverisës mes Lëvizjes Vetëvendosje dhe Lidhjes Demokratike të Kosovës. Ndërkohë, ende nuk dihen detaje për ndarjen e ministrive, postin e presidentit dhe kryetarit të Parlamentit të Kosovës.

Në takimin që u mbajt  të shtunën mes Isa Mustafës dhe Albin Kurtit, u tha se është përmbyllur 100 për qind harmonizimi i programit qeverisës, duke u pajtuar për të gjitha çështjet e hapura, e po ashtu edhe sa i përket kabinetit qeverisës, sipas të cilëve do të ketë 12 ministri.

Krahas kësaj, është raportuar se pesë ministri do t’i takojnë Lëvizjes Vetëvendosje, pesë Lidhjes Demokratike të Kosovës, një minoritetit serb dhe një për minoritetet e tjera.

Njëri nga nënkryetarët e Lidhjes Demokratike të Kosovës, Lutfi Haziri, nuk ka dashur të japë detaje, duke thënë se “këto detaje do të bëhen publike kur të vijë koha”.

Detaje nga kjo marrëveshje, e cila pritet të nënshkruhet nesër, nuk kanë shpalosur as përfaqësues të Lëvizjes Vetëvendosje.

Zyrtari për media nga kjo parti, Arlind Manxhuka, tha se të gjitha do të kuptohen nesër.

“Nuk mundemi ende të shpalosim asnjë detaj nga marrëveshja, meqenëse nesër është paralajmëruar nënshkrimi i marrëveshjes për koalicion VV-LDK, atëherë aty do t’i shohim të gjitha detajet”, ka thënë ai për Kosovapress, përcjell albinfo.ch.

---