Nga 1 dhjetori, qytetarët e Kosovës mund të udhëtojnë pa viza në Tajvan

Albin Kurti, FB

Zëvendësministri i Punëve të Jashtme në Kosovë, Kreshnik Ahmeti ka bërë të ditur se duke filluar nga 1 dhjetori 2024, qytetarët e Republikës së Kosovës me pasaporta të rregullta, diplomatike ose zyrtare do të mund të udhëtojnë pa viza drejt Tajvanit.

Përmes një postimi në rrjetin social “Facebook”, Ahmeti ka shkruar se me këtë rast, shënohet një hap tjetër i rëndësishëm në fuqizimin ndërkombëtar të pasaportës së Kosovës, transmeton albinfo.ch.

“Duke filluar nga 1 dhjetori 2024, qytetarët e Republikës së Kosovës me pasaporta të rregullta, diplomatike ose zyrtare do të mund të udhëtojnë pa viza drejt Tajvanit. Kjo shënon një hap tjetër të rëndësishëm në fuqizimin ndërkombëtar të pasaportës së Kosovës, ku vetëm brenda këtij mandati qeverisës u mundësua udhëtimi pa viza në Zonën Shengen, Emiratet e Bashkuara Arabe, Tajlandë, Izrael dhe tani edhe në Tajvan. Kjo mundësi e re për lëvizje të lirë me Tajvanin hap rrugën për partneritete ekonomike, shkëmbime arsimore dhe bashkëpunim kulturor midis dy shoqërive tona”, ka shkruar ai.