Ngacmimet seksuale në UP, protestojnë studentët 

Alora Hyseni ka thënë se kërkojnë që në Kodin e Etikës për stafin akademik të UP-së në dispozitat e tij të futet edhe termi ‘ngacmimi seksual’

Organizatat studentore SKV, Grupi anti-seksist, Artpolis USPE dhe ORCA kanë protestuar kundër ngacmimeve seksuale në Universitetin e Prishtinës.

Ndonëse në numër jo të madh, aktivistë të këtyre organizatave janë tubuar para Rektoratit të UP-së për t’i adresuar kërkesat e tyre. Alora Hyseni ka thënë se kërkojnë që në Kodin e Etikës për stafin akademik të UP-së në dispozitat e tij të futet edhe termi ‘ngacmimi seksual’.

Dy kërkesat e tjera të studentëve janë që të formohet një komision, i cili do t’i hetonte rastet e mundshme të ngacmimeve seksuale dhe Universiteti i Prishtinës të kërkojë falje për këto raste dhe, sipas tyre, për mosmarrjen e ndonjë veprimi në këtë drejtim.

Hyseni tha e kanë mirëpritur shkarkimin e prorektores Teuta Krasniqi-Pustina, por ka paralajmëruar se protestat do të vazhdojnë deri në realizimin e tri kërkesave të tjera.