Nis ardhja e mërgimtarëve, ja gjendja aktuale dhe pritjet në pikat kufitare

Pikat kufitare janë të qeta pavarësisht fillimit të sezonit veror dhe ardhjes së mërgimtarëve

Me fillimin e sezonit veror dhe ardhjen e mërgimtarëve për pushime, pikat kufitare të Kosovës zakonisht përballen me rritje të fluksit të udhëtarëve dhe krijim të kolonave të gjata, shkruan albinfo.ch.

Megjithatë, sipas të dhënave të fundit nga Ministria e Punëve të Brendshme e Kosovës, situata aktualisht paraqitet e qetë dhe nuk raportohen pritje të gjata në vendkalimet kufitare.

Sipas informacionit të publikuar nga Qendra Kombëtare për Menaxhim Kufitar, në pothuajse të gjitha pikat e kalimit kufitar pritjet për hyrje dhe dalje janë vetëm nga 3 deri në 5 minuta.

Po ashtu, nuk janë raportuar kolona të automjeteve apo vonesa të theksuara në qarkullim, ndërsa autoritetet po vazhdojnë monitorimin e situatës për shkak të rritjes së pritshme të fluksit gjatë muajve të verës. /Albinfo.ch

---