Nis greva në sistemin arsimor në Kosovë, kërkohet rritje e pagave

Të gjitha institucionet e arsimit në Kosovë, i janë bashkuar grevës së përgjithshme për shkak të mosplotësimit të kërkesave nga ana e Qeverisë për rritje të koeficientit për paga.

Shkolla “Elena Gjika” në kryeqytet, ndonëse kishte lajmëruar se nuk do ta përkrahte grevën si shkak i humbjes së mësimit në fillim të vitit shkollor, të hënën i është bashkuar asaj.

Kryetari i SBASHK-ut, Rrahman Jasharaj, ka vizituar çerdhen “Fatosat” dhe shkollën fillore “Hasan Prishtina” në kryeqytet, duke i përkrahur mësimdhënësit në realizimin e kërkesave të tyre. Ai ka kërkuar që të qëndrojnë të palëkundur në kërkesat e tyre, pasi tha se përmes ligjit aktual për paga, vetëm mësimdhënësit janë të diskriminuar.

Jasharaj ka thënë se greva është rezultat i heshtjes së institucioneve. Përfaqësues të SBASHK-ut  kanë zhvilluar një takim me zëvendëskryeministrin, Fatmir Limaj dhe ministrin e Arsimit, Shkencës dhe Teknologjisë, Shyqiri Bytyqi të cilët u kanë premtuar atyre se do t’i mbështesin kërkesat e tyre, por që nuk është arritur ndonjë marrëveshje konkrete. Lëvizja Vetëvendosje akuzon Qeverinë e Kosovës se është fajtore për grevën në arsim.