Nis lëshimi i letërnjoftimeve biometrike

Letërnjoftimet biometrike, siç u tha në një konferencë për media,përmbushin kërkesat e fundit teknologjike dhe të sigurisë, të domosdoshme me standardet e BE-së

Nga dita e sotme, Ministria kosovare e Punëve të Brendshme (MPB) ka filluar lëshimin e letërnjoftimeve biometrike. Me këtë rast autoritetet në Prishtinë kanë përmbushur edhe një kriter të domosdoshëm për liberalizimin e vizave në Bashkimin Evropian.

Letërnjoftimet biometrike, siç u tha në një konferencë për media, përmbushin kërkesat e fundit teknologjike dhe të sigurisë, të domosdoshme me standardet e Bashkimit Evropian dhe implementimit të protokolleve të sigurisë së lartë.

“Është një ditë e rëndësishme për Kosovën, prej sot e përmbushim edhe një kusht për liberalizmin e vizave”, tha ministri i Rendit, Bajram Rexhepi në ceremoninë e lëshimit të letërnjoftimeve biometrike. Sipas tij, letërnjoftimet janë të një kualiteti të lartë.

“Të dhënat që janë në çipin e letërnjoftimit janë të dhëna të avancuara, e që do të jenë obliguese për shtetet e BE-së që t’i përdorin që nga viti 2015. Prandaj qytetarët e Kosovës do të kenë shumë përfitime nga ky letërnjoftim biometrik, për arsye se me shtetet me të cilat kemi marrëveshje, mund të kalohet kufiri vetëm me
letërnjoftim”, tha ai.

Kompania e kontraktuar nga MPB për furnizimin me letërnjoftime biometrike është kompania gjermane Giesecke & Devrient. Çmimi i përgjithshëm i projektit është 7 milionë e 800 mijë euro. Kostoja për mbulimin për letërnjoftim e shpenzimeve është dhjetë euro.

Ndryshe, me letërnjoftimin biometrik qytetarët e Kosovës kanë mundur të lëvizin lirshëm nëpër vendet e Ballkanit. Përveç kalimit me letërnjoftime në Serbi, Shqipëri e Mal të Zi, sipas autoriteteve kosovare, së shpejtë do të fillojë edhe kalimi i lirë edhe në Maqedoni.