Nis mbledhja e dëshmive sipas akuzave të Dick Martyt

Nga misioni i BE në Prishtinë kanë konfirmuar se tashmë dëshmitë janë duke u mbledhur dhe disa persona janë duke u intervistuar

Ekipi hetues për trafikim organesh, që po udhëhiqet nga Clint Williamson ka deklaruar se deri më tani ka marrë vetëm mbështetje politike nga institucionet në Prishtinë, Beograd dhe Tiranë.

Zëdhënësi i këtij ekipi në Bruksel, Juri Laas, i ka thënë Radio Kosovës se tani ekipi që po heton akuzat e raportit të Dick Martyt pret të sigurojë informacione nga një numër burimesh institucionale.

Për më pak se tre muaj që kur çështja e hetimit të akuzave të Dick Martyt është lënë në duart e një ekipi special nën ombrellën e misionit të BE-së, ky ekip sipas zyrtarëve të tij në Bruksel ka realizuar disa çështje esenciale, që kanë të bëjnë me hetimin. Juri Laas, zëdhënësi i ekipit në Bruksel, ka thënë se është më rëndësi që pas mbështetjes politike, ekipi të sigurojë ndihmën institucionale që të përpunoj informacionet e mbledhur.

”Shefi i ekipit Williamson gjatë një vizite që ka bërë së fundi në Kosovë , Serbi dhe Shqipëri, ka marrë zotimin e nivelit të lartë politik se do të ndihmojnë ekipin e hetimeve. Hapi tjetër shumë i rëndësishëm është që Ekipi special hetues të mund të sigurojë informacionet e nevojshme nga segmentet institucionale, në mënyrë që të vazhdohen hetimet”, ka thënë Laas.

Gjithashtu burime brenda ekipit kanë shpjeguar se tashmë është intervistuar një person nga Kosova në cilësinë e dëshmitarit në këtë çështje. Por, nuk është sqaruar nëse dëshmia e këtij personi mbështet ose mohon dyshimet për trafikim organesh gjatë vitit 1999 nga pjesëtarët e ish-Ushtrisë Çlirimtare.

Në fund të gushtit Bashkimi Evropian në kuadër të misionit për sundim të ligjit ka emëruar amerikanin Clint Williamson në krye të ekipit që do të hetojë akuzat e ish senatorit të Këshillit të Evropës, Dick Martyt.

Williamson gjatë vitit 2005- 2007 ka qenë shef i Departamentit të Drejtësisë së misionit të Kombeve të Bashkuara në Kosovë. Albinfo.ch/Telegrafi.