Nisin homazhet për Arian Dacin, varrimi në orën 13:00

Kryeministri i Kosovës, Ramush Haradinaj, me kabinetin qeveritar ka bërë homazhe pranë arkivolit në hollin e Kuvendit të Kosovës.

Haradinaj, i shoqëruar nga anëtarë të kabinetit qeveritar, zëvendësministra dhe bashkëpunëtorë, ka bërë homazhe pranë arkivolit në hollin e Kuvendit të Kosovës, pas ndarjes nga jeta në mënyrë tragjike të zëvendësministrit të Diasporës dhe Investimeve Strategjike, Arian Daci.

Pas homazheve Haradinaj është nënshkruar në librin e zisë. “Arian, i dalluar për vlera njerëzore. Do të na mungosh!”, ka shkruar ai, përcjell albinfo.ch.

Po ashtu, gjatë ditës së sotme nën patronatin e Zyrës së Kryeministrit të Republikës së Kosovës, mbahet mbledhja komemorative nga ora 12:00 në Teatrin Kombëtar të Kosovës, ndërsa në orën 13:00 zhvillohet ceremonia e varrimit në varrezat e qytetit të Prishtinës-Lagjja Arbëria.

Zëvendësministri i Diasporës, Arian Daci, 40-vjeçar, humbi jetën të shtunën në qendrën e skijimit në Brezovicë nga një ortek bore.