Nisin manifestimet “Ditët e Agimit”

Në kuadër të manifestimit “Ditët e Agimit”, sot janë bërë homazhe para shtatores së Agim Ramadanit në sheshin qendror të Gjilanit, në shenjë nderimi dhe respekti për figurën që i bëri nder vendit, përcjell albinfo.ch.

Kreu i Gjilanit, Lufti Haziri, tha se kryengritja e Agim Ramadanit është vlera më e çmuar që u dha shqiptarëve. “Këto janë ditët e lavdisë. Janë shënuar me kryengritje që Agimi e ka finalizuar me hapjen e kufirit në korridorin më të madh të shqiptarëve. Guri i atij kufiri që nuk ekziston më, është në Gjilan, pranë shtatores së Agim Ramadanit. Është krenari për Gjilanin dhe është vlera më e çmuar që kjo kryengritje u ka dhënë shqiptarëve kudo që jetojnë”, ka thënë kryetari Haziri.

Ai më tej ka potencuar se Agimi ka pasuar rrugën e madhe të Idriz Seferit, Mulla Idriz Gjilanit, etj.

Bashkëshortja e heroit, Shukrie Ramadani, ka potencuar dëshirën e madhe që familjet e dëshmorëve kanë për shtetin e Kosovës dhe për zhvillimin e gjithmbarshëm në të gjithë sektorët, sipas amanetit të dëshmorëve dhe flijimit për lirinë dhe pavarësinë e vendit. Ajo gjithashtu ka bërë thirrje që të punohet më shumë gjithandej.