Nisin procedurat për ndërtimin e Autostradës së Dukagjinit

Ende pa u përfunduar autostrada “Arbën Xhaferi” dhe ende pa nisur punimet për Autostradën drejt Gjilanit,  Ministria e Infrastrukturës ka nisur procesin edhe për Autostradën e Dukagjinit.

Kësaj ministrie parashihet t’i kushtojë mbi 1 milion euro hartimi i projektit zbatues të kësaj autostrade, e cila do të kalojë nëpër Istog-Pejë-Deçan-Gjakovë dhe do të përfundojë në Prizren, përcjell albinfo.ch.

Kjo autostradë do të ketë gjatësi prej 91 kilometra. Sipas të dhënave të publikuara në Komisionin Rregullativ të Prokurimit Publik, përzgjedhja e kompanisë fituese është bërë përmes çmimit më të ulët të ofruar. Këtë projekt e ka fituar grupi i operatorëve ekonomikë Infra Plus dhe Infratek. Ministri i Infrastrukturës, Pal Lekaj, në deklarimet e mëhershme, ka thënë se Autostrada e Dukagjinit do të jetë gjiganti i fundit infrastrukturor që do të fillojë më 2019, kurse do të përfundojë brenda tre vjetëve.