Një letër dashurie, u mundëson çifteve të pamartuara të kalojnë kufirin

Përveç dëshmisë së vizitës, duhet të jetë në dispozicion një ftesë me shkrim nga partneri që banon në Zvicër, bashkë me një kopje të pasaportës

Që nga e hëna, (sot) çiftet e pamartuara, kur njëri nga partnerët jeton jashtë Zvicrës, kanë sërish mundësinë që të bashkohen, shkruan srf.ch.

Por për këtë duhen plotësuar disa kushte. Kështu, të dy partnerët duhet të dëshmojnë se kanë partneritet për një kohë të gjatë, transmeton albinfo.ch. Siç shpjegon Departamenti Federal i Drejtësisë dhe Policisë (FDJP) ata duhet të dokumentojnë të paktën një vizitë paraprake në Zvicër ose jashtë saj përpara hyrjes në fuqi të mbylljes së kufijve për shkak të pandemisë Covid 19.

Një kopje e pasaportës me një vulë hyrjeje ose daljeje llogaritet po ashtu si provë.

Duhet të paraqiten gjithashtu dokumente që demonstrojnë një “partneritet afatgjatë”. Departamenti në këtë kontekst i njeh si dokumente të tilla letrat ose postën elektronike, kontaktet përmes mediave sociale, faturat e telefonit, biletat e aeroplanit, fotografitë dhe të ngjashme.

Njohjet e thjeshta nga pushimet nuk konsiderohen të mjaftueshme për të pasur të drejtë hyrje, shprehet FDJP.

Përveç dëshmisë së vizitës, duhet të jetë në dispozicion një ftesë me shkrim nga partneri që banon në Zvicër, bashkë me një kopje të pasaportës, përcjell albinfo.ch. Një konfirmim i partneritetit është gjithashtu i nevojshëm. Të dy palët duhet të dëshmojnë për partneritetin e tyre në një letër ose dokument të skanuar.

---